काठमाडौं, २० चैत । नेपाल प्रहरीले शुक्रबार तीनकुनेमा प्रदर्शनकारी हिंसात्मक रुपमा प्रस्तुत भएपछि गोली चलाउनुपरेको जनाएको छ ।
बुधबार काठमाडौंमा पत्रकार सम्मेलन गर्दै प्रहरीले उत्तेजित भिड हिंसात्मक रुपमा प्रस्तुत भएपछि नियन्त्रणमा लिन गोली चलाउनुपरेको जनाएको हो । नेपाल प्रहरीका केन्द्रीय प्रवक्ता डीआईजी दिनेश आचार्यले अराजक भिडलाई नियन्त्रणमा लिन गोली चलाउनुपरेको बताउनुभयो । प्रदर्शनकारीहरु बिमानस्थलतर्फ अघि बढेपछि शुक्रबार दिउँसो २ बजेर ५४ मिनेटमा प्रहरीले पहिलो गोली प्रहार गरेको उहाले बताउनुभयो । तीनकुने घटनामा २ महिला र १८ पुरुष गरि २० जनालाई गोली लागेको उहाले जानकारी दिनुभयो । आचार्यले आन्दोलनका क्रममा जम्मा ५८ राउन्ड गोली प्रहार भएको, ७४६ राउन्ड अश्रू ग्यास र र १९२ पटक ब्ल्यांक फायर भएको उल्लेख गर्नुभयो । प्रवक्ता आचार्यले तीनकुनेमा भेला भएका प्रदर्शनकारीहरु निषेधीत क्षेत्र तोड्दै संसद भवन तर्फ अघि बढ्न खोजेपछि त्यसलाई नियन्त्रणमा लिन प्रहरीले शुक्रबार १२ बजेर ५० मिनेटमा पहिलो अश्रूग्यास प्रहार गरेको बताउनुभयो ।
त्यसपछि दुर्गा प्रसाई नेतृत्वको भीड तीनकुनेबाट जवरजस्ती अघि बढेपछि प्रदर्शनकारी थप उत्तेजित भएको उहाले जानकारी दिनुभयो । प्रहरीले निषेधीत क्षेत्रबाट हटाएपछि तीनकुनेको मञ्चबाट दुर्गा प्रसाई र रविन्द्र मिश्रले संसद भवन, सिंहदरबार र बिमानस्थल कव्जा गर्न माइकिङ गर्दै निर्देशन दिएको र प्रदर्शनकारी तोडफोडमा उत्रिएको प्रवक्ता आचार्यले बताउनुभयो ।
तीनकुनेमा तोडफोड र आगलागी भएको घरमा जान नसकेपछि प्रहरीले पानीको फोहरा प्रहार गरेको र दमकल जान खोज्दा ढुङ्गामुडा समेत भएको प्रहरीले जनाएको छ । प्रवक्ता आचार्यले उक्त घटनापछि फरार रहेका दुर्गा प्रसाईको खोजि कार्य जारी रहेको र हिंसात्मक गतिविधिमा संलग्नको पहिचान गरि नियन्त्रणमा लिइएको जानकारी दिनुभयो । प्रदर्शनमा प्रहरीले अनावश्यक बल प्रयोग गर्यो भन्ने कुरामा कुनै सत्यता नरहेको र भयावह अवस्थालाई नियन्त्रणमा लिन बल प्रयोग गरेको उहाको भनाइ छ ।
